Оңтүстік Қазақстан облысында 2016-2017 жаңа оқу жылында 73 699 оқушы 1 сынып табалдырығын аттады. Демографиялық өсімі жоғары аймақта сауатын ашып, мектепке барған шәкірттер өткен жылмен салыстырғанда 4 000-ға жуық балаға артық, деп хабарлайды облыс әкімінің баспасөз қызметі.
Жалпы, биылғы жаңа оқу жылында облыстағы алғашқы қоңырау соғылған 1022 мектепте 611 мыңнан аса оқушы білім алады. Бұл — былтырғыға қарағанда 27 мың балаға артық.
Мектептерде жалпы саны 66 412 педагог қызмет атқарады, оның ішінде 52 мыңы (78%) – санаты бар ұстаздар, қалған 22% — жас педагогтар. Жаңа оқу жылының алғашқы күні әр бірінші сынып оқушысына Қазақстан Республикасының Президентінің атынан «Менің Отаным — Қазақстан» кітабы салтанатты түрде сыйға тапсырылып, «Мәңгілік ел» патриоттық актісі шеңберінде бірыңғай «Мен өз Отанымның патриотымын» білім беру сабағы өткізілді.
Жаңа оқу жылындағы жаңалықтарға тоқталсақ. Биыл еліміздің 1 сынып оқушылары бес күндік оқу аптасына көшуде. Ал аптаның сенбі күні есебінен 1 сынып оқушылары мен мұғалімдеріне 34 демалыс күні беріледі.
Сондай-ақ, биыл білім ошақтарында бірыңғай оқулық енгізіле бастайды. Бұл базалық оқулықтар жаңартылған білім беру мазмұнына көшу кестесіне сәйкес енгізіліп, республиканың барлық оқушыларының білім деңгейін теңестіруге жағдай туғызады.
Одан бөлек, биылдан бастап орта білімнің жаңартылған мазмұнына көшу жұмыстарына байланысты жазда облыстағы бастауыш сыныптың жалпы пәндер бойынша 10 мыңға жуық мұғалімі «Назарбаев зияткерлік мектебі» дербес білім беру ұйымының «Педагогикалық шеберлік орталығы» мен «Өрлеу» біліктілікті арттыру ұлттық орталығында даярлық курсынан өтті.
Енді 2016 жылдың қазан-желтоқсаны аралығында критериалды бағалау жүйесі бағытында облыс бойынша 1030 мектеп директоры орынбасарларын мектептік үйлестірушілер ретінде және 30 білім бөлімінің әдіскерлерін аймақтық үйлестірушілер ретінде біліктілігін арттыру курстарынан өткізу жоспарланып отыр.
