Алып та, батыр да, көсем де, шешен де анадан туады. Ананың жағдайы жақсы, көңілі тоқ болса, ұрпақ та бақытты болмақ. Осы ұстанымды жоғары бағалайтын Түркістан облысының әкімі Өмірзақ Шөкеев елдің дамуына елеулі үлес қосқан ардақты әжелер мен ханымдарды, көпбалалы, ұл-қыздары спорт, өнер және қоғамның өзге де сан салаларында жетістікке жеткен абыройлы аналарды шақырып, мерекемен құттықтады. Көпбалалы аналарды да құрметтеді. Ерекше форматта өткен кездесуде шәй үстінде еркін әңгімелесіп, пікірлерін тыңдады.
– Баршаңызды 8 наурыз – Халықаралық әйелдер күні мерекесімен шын жүректен құттықтаймын! Жер бетіне тіршілік таратушы аналар мерекесінің көктемнің алғашқы күндерімен тұспа-тұс келуі – заңдылық. Адам баласы анасының аяулы алақаны арқылы мейірімді, ақ сүті арқылы тіршіліктің нәрін сіңіріп өседі. Қазіргі таңда қыз-келіншектер тек отбасының ұйытқысы ғана болып қойма, қоғамның барлық саласында еңбек етіп жүр. Қазіргі таңда облыста жергілікті атқарушы органдарда қызмет атқаратын нәзік жандылардың үлесі 30 пайыздан асты. Кәсіпкерлік саласындағы қыз-келіншектер саны да күн санап артып келеді. Мемлекет басшысы Қасым-Жомарт Тоқаев өз үндеулерінде, «Жаңа Қазақстан» идеясын жүзеге асыру бағытындағы тапсырмасында ел дамуының алғышарты ұрпақ тәрбиесінде екендігін де баса айтты. Мемлекетіміздің дамуы сіздердің ұрпақ тәрбиелеу ісіндегі көрегенділіктеріңізге байланысты, – деген Өмірзақ Шөкеев аналарға құрмет көрсетті.
Әсерлі жүздесуде Токио Олимпиадасының қола жүлдегері, әлем чемпионы Сәкен Бибосыновтың анасы Мухаббат Құдайбергенова, 2016 жылы Ақтөбе қаласында әскери бөлімге террорлық шабуыл барысында ерлікпен қаза тапқан батыр ұл Сапар Досболдың анасы Жұлдыз Құдабаева және өзге де аналар қатысып, ойлары мен ұсыныстарын айтты. Көпбалалы ана Гүлбаршын Бекетова, Қазақстан халқы Ассамблеясы жанындағы Түркістан облыстық «Аналар кеңесінің» төрайымы Дүйсенкүл Жамболова қоғамдағы қыз-келіншектердің рөлі, ұрпақ тәрбиесі, руханият саласына қатысты ұсыныстарын жеткізді. Көпшілікке тракторшы қыз ретінде танылған жетісайлық Арайлым Құрашбек жастарға қолдау көрсету, еңбекті, өндірісті насихаттау жөнінде сөз қозғады. Жалпы кездесуге қатысқан ардақты аналар мен арулар Түркістанның қысқа уақытта түрленіп, әдемі шаһарға айналғанына таңданыстарын жасырмай, өңірді көркейтіп жатқан ел азаматтарына алғыстарын білдірді.
Жүздесуде мәнді әрі мағыналы ойлар, жылы әзілдер, ұрпақ тәрбиесі, ана мен баланың дамуы, ел бірлігін сақтау және өзге де тақырыпта ойлар қозғалды. Демографиялық өсімі Түркістан өңірінде елдің әлеуетін көтеру бағытындағы жұмыстар жалғасады.
