Облыстық «Арай -2016» өнер байқауы мәресіне жетті. Қазылар алқасының шешімімен жас әншілер арасында бас бәйгені шымкенттік Бағдат Сейітбек жеңіп алды. Жеңімпазға 200 000 теңгенің сертификаты табыс етілді.
Бірінші орынды Созақтан келген Арайлым Көлшікбаева иеленсе, 2-орынды Төле би ауданының тумасы Болат Құрманәлиев пен шымкенттік Аян Төлеген өзара бөлісті. Ал жүлделі 3-орыннан Қаламқас Сейілхан (Шымкент қаласы) мен Жамбыл Құрбанәлиев көрінді.
Ал мәдени іс-шара жүргізушілері арасында бас жүлдені Бағдәулет Мамытов (Шымкент қаласы) қанжығасына байлады. 1-орынға Иген Жансейіт (Шымкент қаласы) лайық деп табылса, 2-орынды Алмат Дүйсенбаев жеңіп алды. Ләйлә Оспанова (Шымкент қаласы) 3-орынға қанағат тұтты.
Айта өтетін ақпар – биыл 20-шы рет қолға алынған өнер додасында 273 үміткер бақтарын сынады. Ал ақтық сында 22 жас эстрада орындаушысы мен 11 мәдени іс-шара жүргізушісі қатысып, таланттарын таразыға салды.
