Түркістан облысы Мақтаарал ауданының тұрғыны Азамат Сапар турникті ұршықша иіретінін видео арқылы көрсетіп, жарты миллион теңгені Мәдениет және спорт министрі Арыстанбек Мұхамедиұлының қолынан алды. Бұл туралы министрліктің баспасөз қызметі хабарлайды.
Астаны қаласының 20 жылдығын мерекелеу аясында «Этноауыл» ұлттық-мәдени кешенінде министр Арыстанбек Мұхамедиұлы бастаған «Challenge Street Workout» акциясының қорытындысы шығарылды. Байқауға еліміздің түрлі өңірлерінен 167 өтінім түскен болатын. Сонымен қатар, АҚШ, Қытай мемлекеттерінен де қатысушылар белсенділік танытыпты.
Қазылар алқасының пікірінше, бейнежазбалардың авторлары челленджге аса жауапкершілікпен қараған. 167 өтінімнің 126-сы қазылар алқасының қарауынан өткен. Қатысушылар арасында елімізге танымал Серік Сәпиев, Әділ Ахметов, Қайрат Нұртас, Денис Тен, Галиб Джафаров, Қанат Ислам, Жақсылық Үшкемпіров, Юрий Мельниченко, Нұрбақыт Теңізбаев, Әсет Иманбаев, Ардақ Назаров, Мөлдір Әуелбекова, Меломен тобы және басқа да спорт және өнер қайраткерлері бар.
Іс-шара барысында Арыстанбек Мұхамедиұлы аталған челлендждің салауатты өмір салтын қалыптастыруда маңыздылығын атап өтті.
«Осы челлендждің қатысушыларына алғыс білдіремін. Бұл біздің соңғы акциямыз емес, бұдан әрі де мұндай шараларды жалғастырамыз», – деді Арыстанбек Мұхамедиұлы.
Айта кетейік, шоу-бизнес, кино және спорт жұлдыздары, сондай-ақ көптеген қазақстандық азаматтар Мәдениет және спорт министрі Арыстанбек Мұхамедиұлының бастамасымен ұйымдастырылған «Street Workout KZ» акциясына қатысқан болатын. Жобаның негізгі шарты – қазақстандықтар спорттық жаттығу барысындағы видеоларын желіде бөліссе жеткілікті.
