Шымкент қаласына 350 мыңға жуық турист келген

42

Мемлекет басшысы Қасым-Жомарт Тоқаев әлемде қарқынды дамып келе жатқан маңызды сектор – туризмнің экономикалық дамудың локомо­тиві бола алатынын айтқан болатын. Бүгінде үшінші мегаполиске туристерді тарту жұмыстары қарқынды түрде жүргізіліп жатыр. Ол үшін түрлі бағыттағы жұмыстар атқарылуда.

Күні кеше Шымкент қаласының туристік әлеуетін арттыру үшін Туризм және сыртқы байланыстар басқармасы, «Visit Shymkent» туристік ақпараттық орталығының ұйымдастыруымен «Shym Qala» этно ауылында «Этно Шымкент» фестивалі өтуде.
Фестиваль аясында алдымен «Ұлы Жібек жолы» керуені жүріп өтті. Атақты тарихи желі барысында сол заманғы көріністер көрермен назарына ұсынылды. «Тұран» этно-фольклорлық ансамблі мен жергілікті өнерпаздар ұлттық нақыштағы әндерден шашу шашты. «Tary», «Jeti tandyr», «Bro Shashlyk», «MaxPLOV» – дәмханалар желісі  келушілерге ұлттық және шығыс тағамдары дайындалды. Ұмытылып кеткен ұлттық тағамдарды жаңғыртып, келушілерге ұсынып жүрген дәмханалар бұл жолы да жолынан жаңылған жоқ. Одан өзге, ұлттық киімдер көрсетілімі, ұлттық тағамдардың әзірлену жолы көрсетілді. Қаланың жергілікті қолөнершілері, театр әртістері мен суретшілері де өз жұмыстарын ұсынды. Іс шараның мақсаты – қала тұрғындары мен қонақтарына тарихи деректерге сүйене отырып, «Жібек жолы» бойындағы көне Шымкент қаласының атмосферасын, тұрмыс-салтын көрсету.
Іс-шара барысында қолөнер, кәдесый бұйымдарын жасау, ұлттық тағамдар бойынша шеберлік сағаттары ұйымдастырылып, кешкі уақытта от, барабан және лазерлік шоудың ұмытылмас қойылымы өтті. Сондай-ақ «Тұран» этнофольклорлық ансамблінің концерттік бағдарламасын ұсынды.
“Алдағы уақытта да қаламыздың терең тарихы мен мәдениетімізді ұштастыра көрсететін осындай игі шараларды дәстүрлі түрде өткізуді жоспарлап отырмыз. Бұл іс-шара арқылы біз қаламыздың танымалдылығын арттырып, әрі халыққа есте қаларлықтай әсер сыйлауды ниет етті”,- деді басқарма басшысы Е.Қыдыров.
Жалпы, бүгінде Шымкенттің тарихи, мәдени орындарына саяхаттау мақсатында түрлі туристік маршруттар әзірленіп, олар жайлы ақпарат беретін гид-экскурсоводтар қызметі ұйымдастырылған және туристік автобустар жолға қойылған.
Соңғы 9 айда экспресс көрсеткіш бойынша Шымкент қаласына 350 мыңға жуық турист келсе, оның 25 мыңнан астамы шетелдіктер. Ұйымдастырушылар осындай іс шараларды көптеп ұйымдастырудың арқасында шаһарға келушілердің санын 400 мыңға жеткіземіз деп отыр.