Әл-Фараби АПБ-ның кезекші бөліміне жергілікті жердің тұрғыны арызданған. Ол арызында, өзі сатылымға қойған «ВАЗ-2114» маркалы автокөлігін бөгде екі ер адам алдымен айдап көріп, сосын сатып алатынын айтып, сеніміне кіру арқылы тізгіндеген бойы оқиға орнынан бой тасалағанын жазып көрсеткен. Келтірілген шығын көлемі — 650 000 (алты жүз елу мың) теңге.
Аталған жайт ҚР ҚК-нің 190-бабы 2-бөлігі (Алаяқтық) бойынша сотқа дейінгі тергеп-тексерулердің бірыңғай тізіліміне тіркелді.
Тәртіп сақшылары күдіктілердің жеке бастарын анықтауға бағытталған барлық қажетті шараларды қабылдап, жедел-іздестіру жұмыстарын жүргізді. Нәтижесінде, Түркістан облысының тұрғындары анықталып, жеткізілді. Екеуінің де жасы – 21-де. Бұрын-соңды сотты болмаған.
Қазіргі кезде ұсталған азаматтар кінәларын толықтай мойындап, заңсыз әрекетке қаржы тапшылығынан барғандарын және бұл үшін өкінетіндерін жеткізді. Тергеу әрекеттері жалғасып жатыр.
Осы ретте, полиция қызметкерлері азаматтарға жеке мүліктеріне мұқият болып, сақтық шараларын қатаңдатуды ескертеді.
