Егер жұмыс беруші жалақыңызды кешіктіріп жатса, не істеуге болады? Бұл сұраққа редакция заңгері Венера Нұрғалиқызы жауап берді.
Заңгердің айтуынша, жұмыс беруші айлықты келесі айдың 10-ына дейін беруге құқылы.
«Егер 10-ынан кейін кешіктірсе, Қазақстан Республикасы Еңбек кодексінің 113-бабына сәйкес жұмыс беруші әр кешіктірген күнге өсімпұл қосып төлеуге міндетті. Өсімпұл мөлшері жалақы төлеу жөніндегі міндеттемелерді орындау күніне Ұлттық Банктің 1,25 еселенген базалық мөлшерлемесі негізге алына отырып есептеледі»,-деді Венера Нұрғалиқызы.
Егер жұмыс беруші сіздің жалақыңызды кешіктіріп жатса, онда сіз жергілікті еңбек инспекциясына барып шағымдана аласыз.
