Шабуылшы өзінің кішкентай құрбандарын көпқабатты үйлердің ауласынан тапқан. Қыздарды шаштарын өріп, әдемі сәндеуге көндіріп, құлақтарындағы алтын сырғаларын шешіп, бірден көзден ғайып болып отырған. Ол үш күннің ішінде қаланың 4 жас тұрғынының алаяқтық жолмен қымбат әшекей бұйымдарын алып, 300 мың теңгеге жуық шығын келтірген.
Қылмыс туралы хабарлама түскен Әл-Фараби аудандық полиция басқармасының жедел уәкілдері дереу күдіктіні іздеуге кірісті. Полиция оқиға болған жердің жанында орналасқан бейнебақылау камераларының жазбаларын тексерді. Қабылданған шаралар нәтижесінде қалада 20 жастағы бойжеткен ұсталды. Ол ұрланған тауарды ломбардқа өткізген болып шықты.
Мұндай қылмыстардың алдын алу үшін тәртіп сақшылары қырағы болуға, жас балаларды қараусыз қалдырмауға кеңес береді.
