№53 жабық түзеу мекемесіне (Ленгер тас жолында орналасқан колония) бару және шағымдарды қарау кезінде аймақтық адам құқықтары жөніндегі өкіл Нұржан Әбдезов тұтқындардың бірімен жеке кездесу өткізді.
«Кездесу барысында тұтқындардың бірінің қолының қатты ісінгенін және ер адамның терісінің қарайғанын байқадым. Осыдан кейін тиісті құқықтық процедуралық шаралар қабылданды», — деп хабарлады Әбдезов мырза.
Сонымен қатар, кездесу барысында тағы бір тұтқынның ұрып-соғылып, жағы сынғаны анықталды. Аймақтық өкіл жоғарыда аталған жағдайларға байланысты дереу шара қолданды.
Нәтижесінде медицина қызметкерлері уақтылы медициналық көмек көрсетпегені үшін жазаланды, ал мекеме қызметкерлеріне қатысты Қылмыстық кодекстің 362-бабы бойынша сотқа дейінгі тергеу басталды. Адам құқықтары институты мекеме қызметкерлерінің азаптау дәлелдеріне байланысты әрекеттерін қайта қарау туралы жоғары қадағалау органына шағым түсірді.
Бас прокуратура бұл ұстанымды қолдады, ал өткен жылдың соңында сотқа дейінгі тергеу Қылмыстық кодекстің 146-бабының 3-бөлігі бойынша қайта сараланды. Мекеменің үш қызметкері қамауға алынды.
