Оңтүстік Қазақстан облыстық кәсіпкерлерге қызмет көрсету орталығының кәсіпкерлік мектебіне Қазақстанның жас кәсіпкерлері қауымдастығының төрағасы Мақсат Қожамбек келді. Аталған қауымдастық жас бизнесмендерге арнап әлемге танымал жазушылардың ағылшын тіліндегі кітаптарын қазақ тіліне аударған.
Осыған орай Қазақстан бойынша алғаш рет Оңтүстік өңірінде бастау алатын «Шабыт» республикалық жобасының шеңберінде қауымдастық төрағасы облыстық кәсіпкерлерге қызмет көрсету орталығының кәсіпкерлік мектебіне «Друкер күнделігі» (Питер Друкер), «Ойлан және байы» (Наполеон Хилл) және «Қаржылық тәуелсіздікке жол» (Бодо Шефер) атты кітаптардың 1000 данасын тарту етті.
Мұндағы басты мақсат – облысымыздағы жас кәсіпкерлердің экономика саласында білімдерін жетілдіріп, табысқа жету үшін қандай әрекеттер жасау қажет және оған қалай қол жеткізуге болатындығын үйренуге ықпал ету. Бастауыш кәсіпкерлер қазақ тіліне аударылған бұл еңбектерді Кәсіпкерлік мектебінде жүргізілетін оқыту курстарын тәмамдаған соң, сертификатпен бірге алатын болады.
[youtube]http://www.youtube.com/watch?v=zng8hyc2p_A[/youtube]
Сондай-ақ, жиын соңынан ОҚО КҚКО мен Қазақстанның жас кәсіпкерлер қауымдастығы арасында облысымызда жас кәсіпкерлікті дамыту саласындағы өзара ынтымақтастықты нағайтуға бағытталған меморандумға қол қойылды.
