Шымкентте француз өнімдерін пісіретін «Ла Тартине» кондитерлік цехы ашылды. Қаланың қақ ортасында орналасқан наубайханада нан өнімдерінің 70-тен аса түрі пісіріледі.
Мемлекеттік бағдарлама аясында кәсіпкерлікке тиесілі көмекке ие болған цехта дүкен мен асхана жұмыс істейді. Барлық өнімдерге қосылатын қоспалар Франциядан, құрал-жабдықтар Италия елінен арнайы алдырылған.
Кәсіпкерлік нысанда қазір 10-ға жуық адам жұмыспен қамтылып отыр. Шетелдік құрал-жабдықтардың ерекшелігі сол – жартылай дайын өнімдерді көз алдыңызда әп-сәтте әзірлеп береді. Осыған дейін Астана және Алматы қалаларында жұмыс істеп тұрған кондитерлік желінің өнімдері енді шымкенттік жұртшылыққа да жеткізіліп отыр.
