Түркістан түркі әлемінің рухани астанасы болып бекітілді. Бұл туралы онлайн форматта өткен бейресми саммитінде белгілі болды. Жиында түркітілдес елдердің бірінші басшылары бас қосып, әлемдегі қазіргі жағдайды талқылады.
Өз кезегінде Қасым-Жомарт Тоқаев ұсынысты қабыл алған президенттерге алғысын білдірді. Және аталмыш кездесудің Түркістан қаласында өткізілетіні жоспарланғанын, алайда қатерлі індетке байланысты қашықтан өткізіліп отырғанын жеткізді.
Қасым-Жомарт ТОҚАЕВ, ҚР Президенті: «Бұл басқосуды бәріміз үшін қасиетті Түркістанда ұйымдастыруды жоспарлаған едік. Алайда пандемияға байланысты күрделі ахуалға орай біз саммитті онлайн форматта өткізуді жөн көрдік. Індеттің беті қайтқан соң, бұрынғыдай бетпе-бет жүздесеміз деп сенемін. Осы мүмкіндікті пайдалана отырып, баршаңызды Наурыз мейрамымен тағы да құттықтаймын. Бұл – күллі түркі жұртының төл мерекесі. Бауырлас елдерге бақ-береке тілеймін».
Бұған қоса мемлекет басшысы сын сағатында түркітілдес елдердің ынтымағы беки түскенін ерекше атап өтті. Және алдағы уақытта Қазақ- түрік университетінде түркітілдес елдердің шәкірттері үшін 50 гранттың бөлінетінін жеткізді. Сондай-ақ, Ұлы түркілер қорын құруды ұсынды.
Назерке Үкібасова
