Шымкент прокурорлары әлеуметтік баспана алудың қылмыстық схемасын әшкереледі. Күдіктілер 33 қала тұрғынына мемлекеттік мекемеде жұмыс істейтіндігі туралы жалған анықтама беріп, баспана кезегіне қойған. Осы фактілер бойынша қылмыстық іс қозғалды.
«Бірінші схема бойынша адамдар мемлекеттік қызметке жұмысқа орналастырылған. Екінші схема – тұрғылықты мекенжайды заңсыз тіркеу фактілері. Тұрғын үй қатынастары туралы заңда тұрғын үй кезегінде тұрғандар республикалық маңызы бар қалаларда 3 жыл тұруы тиіс екені анық жазылған. Тергеу барысында бұл фактілердің бұрмаланған фактілері анықталды», — дейді Шымкент қалалық прокуратурасының 3-бөлімінің прокуроры Нұрсұлтан Ахметов.
Қадағалау органының мәліметінше, қазір Шымкенттің тағы 147 тұрғынын жалған тіркеу фактісі бойынша қылмыстық іс қозғалып жатыр. Жаңа автоматтандырылған кезекті тіркеу қызметі енгізілді, ол негізінен жалған тіркеу мүмкіндігін жойып, негізсіз өтініштерді «сүзуге» мүмкіндік береді.
