Түркістан облысында түрменің 4 қызметкері жауапқа тартылды

44
Barbed Wire Fence. Prison or border fence with razor wire against dark sky. Security concept

(Фото: pixabay.com)

Адам құқықтары жөніндегі уәкілдің Түркістан облысы бойынша өкілі Қылмыстық-атқару жүйесі комитетінің №55 түзеу мекемесін тексеру барысында сотталғандардың әлеуметтік міндетті төлемдерге, медициналық сақтандыру (OSHI) және зейнетақы қорларына аударымдарын зерделеді.

Нәтижесінде жарамдылық мерзімі өткен, сондай-ақ жеке басын куәландыратын құжаттары болмаған 134 сотталғанға міндетті медициналық сақтандыру жарнасы төленбеген. Сонымен қатар кейбір жұмыс істейтін сотталғандардан жоғарыда аталған себептер бойынша зейнетақы жарналары алынбаған.

Осыған байланысты уәкіл өкілі Қылмыстық атқару жүйесі комитеті Шымкент қаласы мен Түркістан облысы бойынша департаментіне ұсыныс жолдады. Нәтижесінде қызметтік тексеріс жүргізіліп, 134 сотталғанның тиісті құжаттары ресімделді. Зейнетақы мен міндетті әлеуметтік медициналық сақтандыру бойынша мемлекеттік жарналардың төленуі қамтамасыз етілді.

«Анықталған бұзушылықтарға жол берген мекеменің 4 қызметкері тәртіптік жауапкершілікке тартылды. Уәкіл өкілінің араласуынан кейін ғана сотталғандардың мүдделерін денсаулық сақтау және зейнетақымен қамсыздандыру салаларында әлеуметтік қорғау бойынша шаралар қабылданды»,-делінген Адам құқықтары жөніндегі уәкілдің баспасөз қызметі берген мәліметте.