Шымкент қаласының әкімшілік құқық бұзушылықтар жөніндегі мамандандырылған ауданаралық сотында М.-ға қатысты ӘҚБтК-нің 200-бабы 3-бөлігімен (Қазақстан Республикасы заңнамасының алкоголь өнімін өткізу жөніндегі талаптарын бұзу) әкімшілік құқық бұзушылық іс қаралды.
М. 2025 жылдың 9 қаңтар күні сағат 21:30 шамасында, Шымкент қаласы Есенберлин көшесінің бойында орналасқан дүкенде 1 дана «Родная степь» арақ алкоголь өнімін сатқаны анықталған.
ӘҚБтК-нің 200-бабының 3-бөлігінің диспозициясына сәйкес — мейрамханаларда, барларда және дәмханаларда өткiзудi қоспағанда, алкоголь өнiмiн сағат 23:00 ден келесі күнгі сағат 8:00 ге дейiн; этил спиртінің көлемді үлесі отыз пайыздан асатындарын сағат 21:00 ден келесі күнгі сағат 12:00 ге дейін бөлшек сауда арқылы өткiзген үшін әкімшілік жауапкершілік көзделген.
Құқық бұзушының кінәсі іс-құжаттарымен қоса, өзінің берген түсінігімен, әкімшілік құқық бұзушылық туралы хаттамасымен және тағы басқа да іс бойынша жинақталған құжаттармен толық дәлелденіп, аталған мән-жайларға сүйене отырып, құқық бұзушының жауаптылығын жеңілдететін мән-жай оның кінәсінің мойындағанын, ал жауаптылықты ауырлататын мән-жай анықталмағанын ескеріп, сот оған алкоголь өнімін сату түрі лицензиясының қолданысын 1 (бір) ай мерзімге тоқтата тұрып, оған 157 280 (бір жүз елу жеті мың екі жүз сексен) теңге мөлшерінде әкімшілік айыппұл жазасын тағайындады. Сот қаулысы заңды күшіне енбеген.
