2026 жылдың қаңтар айының алғашқы аптасында Шымкент қаласында «Әскерге шақырылушылар мен әскери міндеттілерді даярлаудағы жаңа тәсілдер» тақырыбында оқу-әдістемелік жиын өтті. Іс-шара Қазақстан Республикасы Қорғаныс министрлігінің «Әскери-техникалық мектебі» РМҚК Бас директоры, отставкадағы генерал-майор Адылбек Әлдабергеновтің басшылығымен ұйымдастырылып, оған еліміздің барлық әскери-техникалық мектептерінің басшылық құрамы қатысты.
Жиынның негізгі мақсаты – кәсіпорын қызметін бірыңғай жүйеге келтіру, филиалдарда жүргізілетін оқу-тәрбие үдерісіне ортақ талаптар мен заманауи әдістерді қалыптастыру.
Жиын барысында ҚР ҚМ «Әскери-техникалық мектебі» РМҚК-ның 2025 жылғы қызметінің қорытындылары талданып, 2026 жылға арналған негізгі міндеттер айқындалды.
Сонымен қатар қатысушылар үшін 10-нан астам әдістемелік-нұсқаулық және көрсетілім сабақтары ұйымдастырылды. Жиынның жоғары деңгейде өтуіне 35748 әскери бөлімінің және Сабыр Рахымов атындағы әскери колледжінің әскери қызметшілері белсенді атсалысты.
– Қатысушылар жиынның ұйымдастыру деңгейіне жоғары баға берді. Өткізілген сабақтар әскерге шақырылушылар мен әскери міндеттілерді даярлау сапасын арттыруға бағытталған нақты тәжірибелік маңызға ие болды, – деп атап өтті Қазақстан Республикасы Қорғаныс министрлігінің «Әскери-техникалық мектебі» РМҚК Шымкент филиалының бастығы Болат Жорабаев.
Жиын аясында оқу-тәрбие жұмысында жинақталған озық тәжірибелер сараланып, әскерге шақырылушылар мен әскери міндеттілерді даярлау пәндері бойынша заманауи тәсілдер кеңінен таныстырылды.
