Қазақ хандығының 550 жылдығының Тараздағы төрт күнге жалғасқан дүбірлі тойына Ұлы Жібек жолын қайта түлеткен керуен келді. Аспан асты елінің Сиань қаласынан шыққан түйе керуені 5 қазан күні Тараз қаласына жеткен еді. Содан кейін осы қалада аялдаған керуен 8-9 қазандағы Қазақ хандығының 550 жылдық тойында Тараздың тарихи жерлерімен, той өтіп жатқан орындарымен жүрді.
20 шақты түйе, 4 ат арба мен жүк көліктерінен, 64 адамнан құралған керуеннің мақсаты біреу, ол — Ұлы Жібек жолының даңқын жаңғыртып, тармақтарына қан жүгірту. Осы үшін де Таразға жеткенше 5 провинция, 2 облыс пен 300-ден астам елдімекен аумағын басып өтті.
Керуеннің Сиань қаласынан шығуының да себебі бар. Өйткені, ҚХР-дің Шэньси провинциясына қарасты Сиань қаласы – Ұлы Жібек жолының бастауы саналады. Ал, тарихи тереңнен басталатын Тараз қаласы – кезінде осы Ұлы Жібек жолының бойындағы үлкен әрі маңызды қалалардың бірі болған.
фото (с) Жәнібек НҰРЫШ
