«Әлемді кітап арқылы танимын!». Бүгін Ы.Алтынсарин атындағы балалар кітапханасы осындай тақырыптағы байқауды қолға алды. Жарыстың ерекшелігі сол – көпшіліктің рухани қазына – кітапқа деген құрметін еселеуі ғана емес, айтулы бәсеке тек оқырмандар арасында өрбиді.
Яғни, бұл байқауда кітапханаға жиі келіп, тұрақты оқырмандар тізімін толықтырғандардың енді әдеби сауат-білімі сараланып, жаттау қабілеті таразыланып жатыр. Ұйымдастырушылардың сөзіне сенсек, үміткерлер үшін екі бірдей ереже бекітіліп, жас ерекшелігі де ескеріліп отыр.
Зоя Бегежанова, Ы.Алтынсарин атындағы балалар кітапханасының директоры: «7-10 жас аралығындағы балалар мен 11-15 жастағы оқырмандарымыз екі жасақ негізінде сайысқа қатысып отыр. Байқаудағы бірінші кезең – таныстыру болса, екіншісі – жергілікті ақын-жазушылардың өлең-жырын жатқа орындау. Қуантарлығы – биылғы жарыстың қатысушылары өте белсенді. Мұны авторларға деген құрметі мен шығармаларын жатқа оқып жатқанынан-ақ байқауға болады». 
«Әлемді кітап арқылы танимын» атты оқырмандар жарысы биыл 4-жыл қатарынан ұйымдастырылды. Және жарысқа 26 үміткер жолдама алған. Сонымен, айтулы бәсекенің бас жүлдесін Отырар ауданының тумасы Мұстафа Шоқай мен ордабасылық Бексұлтан Серікбай жеңіп алды. Жеңімпаздарға қаржылай сый-таралғы тапсырылып, республикалық байқауға жолдама берілді.
Айта өтетін ақпарат, биыл қаламыздағы Ы.Алтынсарин атындағы кітапхананың қызметін бастағанына – 56 жыл толып отыр. Және мәдени ошақтың кітапқоры – 256 мыңға жеткен.
