Шымкентте мәдениет басқармасынан 610 млн. теңгеге жуық қаржы жымқырғандарға сот үкімі шықты. Карантин кезінде концерт өткіздік деп есеп берген олар шын мәнінде ешқандай іс-шара ұйымдастырмаған.
Ал, бөлінген ақшаны қалтаға басып отырған дейді судья. Бастапқыда бұл іске 6 адам күдікті деп танылған еді. Бүгін сот залынан үшеуі босатылды. Олар басқармаға қарасты мәдениет үйінің директоры мен міндетін атқарушы және есепшісі. Соңғысы шартты түрде 7 жылға сотталды.
Ал, басқарма мен мәдениет үйінің бас есепшісі 7 және 8 жылға бас бостандығынан айырылды. Олармен сыбайлас болған кәсіпкер де 7 жыл арқалады.
Абсаттар Шахидинов, судья: «Сотталушының бірі жеке кәсіпкер. Өз атына тіркелген және оның туыстары, жақындарының аттарына тіркелген жеке кәсіпкерлік субьектілер болған. Сол субьектілерге мәдени іс-шаралар атқарылды. Оған мынанша қаржы деп есепшотқа аударылып отырған».
