Қаратау ауданында таңмен таласа коммуналдық қызметкерлер мен берсенділер сенбілікке шықты. Мұнда олар 15 гектар алқапты күл-қоқыстан арылтты.
ҚР Президентінің бастамасымен қолға алынған «Таза Қазақстан» жалпыұлттық акциясы Шымкент қаласын кең ауқымда жалғасын тауып жатыр. Бұл акция жаңа экологиялық мәдениетті және азаматтардың қоршаған ортаға саналы көзқарасын қалыптастыруға бағытталған.
Бұл жолы науқанға «AMANAT» партиясы атсалысып, өз үлесін қосып жатыр.
Атап айтқанда бүгін республикалық «Таза бейсенбі» акциясы Қаратау ауданына қарасты Нұртас шағынауданында өтті. Тазалық жұмысына Қаратау ауданының әкімі мен белсенді жастар, сондай-ақ, «Аманат» партиясының депутаттары қатысып, көше бойларын тазалау, қураған шөптерді жұлу, қоқыстарды шығару жұмыстарына атсалысты.
Қаратау ауданының құрметті азаматтары мен ақсақалдары да іс-шарада бой көрсетті. жергілікті ақсақал Пердеш Есембекұлы жастарға бата беріп, өңір тазалығын сақтауға үлес қосқан жандарға алғысын жеткізді.
«Партияның аймақтық сайлауалды бағдарламасында өңірдің экологиялық жағдайын жақсартуға арналған ауқымды міндеттер тұр. Бүгінде аумақтарды, өзен-көлдердің жағалауларын тазарту, қаланың көшелерін көгалдандыру жұмыстары белсенді жүргізілуде. Алдыңғы бейсенбілікте 13 гектар жерді, бүгін 15 гектар жерге тазалық жұмыстары жүргізілді. Тек тазалық ғана емес, жастардың ауызбіршілігі, ұлттық сана-сезімі арта түскен акция жыл бойына жалғасын табады», – деді Мұрат Жолдыхожаев.
Сонымен қатар, тұрғындарға ауланы таза ұстау, көше бойына қалдықтарды тастамау бойынша түсіндіру жұмыстары да жүргізілді.
