«Береке күні» атап өтілді

723
Наурыздың 17-сі "Береке күні" деп белгіленді
Наурыздың 17-сі "Береке күні" деп белгіленді
Наурыздың 17-сі «Береке күні» деп белгіленді

Жексенбі, 17 наурыз Оңтүстік Қазақстан облысында «Береке күні» деп аталып өтті. Бұл күні өңіріміздегі балалар үйлерінің тәрбиеленушілеріне, қарттар үйіндегі қарияларға және аз қамтамасыз етілген отбасыларға қайырымдылық шаралары ұйымдастырылып, көмек көрсетілді.  

Наурыз береке-бірліктің, қайырымдылықтың, кешірімнің мейрамы. Ата-бабаларымыз бұл мейрам кезінде жарлы-жақыбайға қайырымдылық жасауды да ұмытпаған. Қазақтың байлары «шүлен тарату» дәстүрін жасап, кедей-кепшікке мал-мүлік, бұйым үлестіріп, тегін ас таратқан. Бұл халқымыздың жомарттығының көрінісі саналатын дәстүр.

Облыстық басқармалар мен аудан, қала әкімдіктері Арыс қаласындағы Т.Тәжібаев атындағы, Төлеби ауданындағы №2, Шымкент қаласындағы №3, Сайрам ауданындағы №4 балалар үйлері мен Сайрам ауданындағы «Бауыржан» отбасылық негіздегі балалар үйінің тәрбиеленушілерін, облыстық қарттар мен мүгедектерге арналған медициналық әлеуметтік мекемесіндегі азаматтарды Наурыз мерекесімен құттықтап, сый-сияпат жасады. Сондай-ақ, Шымкент қаласы әкімдігінің бастамасымен Оңтүстіктегі қалталы кәсіпкерлер аз қамтамасыз етілген мыңға жуық отбасыға қайырымдылық көмек көрсетті.

«Береке күніндегі» бұл шаралар ата-баба дәстүрін ұлықтап, ел бірлігін бекемдеуге септігін тигізеді. Қоғамымызда мейірім мен шапағаттың, адамгершілік пен ізгіліктің үстем болуына үндейді.