Оңтүстік Қазақстан облыстық ішкі істер департаментінің қызметкерлері өңірдегі тілшілерді төл мерекелерімен құттықтады. «Абай» саябағындағы «Колизей» мейрамханасына жергілікті телеарна және газеттердің журналистерінен бастап, республикалық телеарналардың меншікті тілшілері де толық құраммен жиналды. Араларында операторлар мен бейнеинженерлер де бар. Бұқаралық ақпарат құралдарының өкілдерін ішкі істер департаментінің мемлекеттік тіл және ақпарат, кадр басқармаларының басшыларының өздері құттықтап, сый-кәделерін тарту етті.
Одан кейін полицейлер тілшілерді ортаға шақырып, сөз тізгінін ұсынды. «Отырар», «Қазақстан-Шымкент», «Хабар», 24 kz», «Қазақстан», «КТК», «7-арна», «Астана», «1-арна Евразия» секілді телеарналардың журналистері өздерін құрметтеп, сыйлаған тәртіп сақшыларына алғыстарын жеткізді.
Айта кету керек, осындағы тілшілер мен оператор, бейнеинженерлердің біразы «Отырар» телеарнасының түлектері. Нақты айтқанда, мерекелік дастархан басына жиналған журналистердің кемінде 12-сі «Отырар» телеарнасында жұмыс істеп, шеберлігін шыңдаған.
