Шымкентте төтенше жағдай орын алды. Өрт шыққан пәтер ішінде қалған әйел қайтыс болды. Түнгі сағат 12-ге жуық Республика даңғылы бойындағы № 17 «а» үйдің тұрғындары өрт сөндіру қызметінің кезекші бөліміне хабарласып, көмек сұраған. Айтуларынша, осындағы пәтердің бірінен қою түтін шығып жатқан. Дабыл бойынша оқиға орнына 3 арнайы топ пен жеке құрамның 11 маманы шұғыл аттанады.
Олар келгенде пәтердің іші көк түтінге толып үлгерген еді. Ас бөлме мен жатын бөлме жанып жатыр. Өрт сөндірушілер алдымен подъездегі адамдарды қауіпсіз жерге, яғни, сыртқа алып шықты. Одан кейін өртті сөндіруге кірісті.
Тілсіз жау 40 минуттың ішінде толық ауыздықталды. Бөлмелердің ішін тексерген өрт сөндірушілер әйел кісінің денесін тапты. Өкінішке орай, оны ажалдан арашалап қалу мүмкін болмаған.
[youtube]https://www.youtube.com/watch?v=0YALSg1Jx58&noredirect=1[/youtube]
Өрт сөндірушілер марқұмның мәйітін полиция қызметкерлеріне тапсырды. Қазір қайғылы жағдайдың толық себеп-салдарын тәртіп сақшылары анықтап жатыр.
