Оңтүстік Қазақстан облысында 2004 жылдан бастау алған «Жасыл ел» бағдарламасы бойынша жыл сайын мыңнан аса жас жазғы еңбек лагерлеріне тартылса, осы жылдар ішінде 15 мыңға жуық жас маусымдық жұмыспен қамтылған. Бұл туралы өңірлік коммуникация қызметінде өткен баспасөз конференциясында облыстық жастар саясаты басқармасының басшысы Балмаржан Нарбекова мәлімдеді.
Жастардың бос уақытын тиімді пайдалануына жағдайлар жасау жайын баяндаған басқарма басшысы 2017 жылға республикалық бюджеттен 63,1 млн теңге бөлініп, 1275 жас сарбаз кезең кезеңімен көгалдандыру жұмыстарына тартылғанын айтса, маусым айында 205 жас жұмыспен қамтылғанын жеткізді.
— «Жасыл ел» еңбек лагерлеріне тартылатын жастардың басым бөлігі М.Әуезов атындағы ОҚМУ, Оңтүстік Қазақстан мемлекеттік педагогикалық институтының және Шымкент аграрлық колледжі студенттері болса, аудан, қалаларда көбінесе жұмыссыз жас азаматтар тартылуда. Олардың орташа еңбек жалақысы 60-65 мың теңге көлемінде, — деді спикер.
Бұдан өзге жазғы еңбек лагеріне қатысушы жастарға арнайы киім — футболка, бейсболка, жазғы шалбар мен күртеше және аяқ киім беріледі екен.
Басқарма басшысы жазғы студенттік құрылыс отрядтары бойынша аудан, қалаларда салынып жатқан құрылыс нысандарында 424 жас еңбек етіп жатқанын мәлімдеді.
— М.Әуезов атындағы ОҚМУ құрылыс мамандығы бойынша білім алып жатқан 200-ге жуық студент Қазығұрт ауданы мен Түлкібас ауданындағы арнайы индустриялдық аймақта өндірістік практикадан өтуде. Жалпы облыстағы 12 жоғары оқу орындарының алтауында кәсіптік және өндірістік білім беру мамандықтарында оқитын 1106 студент облыстағы 64 кәсіпорын мен зауыт-фабрикада өндірістік практикадан өтуде, — деді Б.Нарбекова.
Жалпы жастардың бос уақытын тиімді пайдалануын ұйымдастыруда басқарма тарапынан көптеген жұмыстар ұйымдастырылуда. Солардың бірі — барлық аудан, қалалардағы орталықтар жанынан құрылған «Еріктілер мектебі». Бүгінгі таңда облыс бойынша 4 мыңнан астам ерікті жас бар. Олардың тікелей қатысуымен жыл басынан бері 300-ден астам қайырымдылық іс-шара, ақпараттық түсіндіру жұмыстары ұйымдастырылған.
ОҚО әкімінің баспасөз қызметі
Фото: Самат Мырзалиев
