Судьялар студенттерге «Ашық есік күнін» өткізді

241

Шымкент қаласының мамандандырылған ауданаралық экономикалық сотында болашақ заң саласының қызметкерлеріне арналған «Ашық есік күні» өткізілді. Іс-шараның мақсаты – соттарды цифрландыру бағытында сот қызметіне енгізілген жаңа технологиялар жайлы толық ақпарат беру болды.

Іс-шараға төрағаның міндетін атқарушы Серік Кәрім, бас маман-сот мәжілісінің хатшысы Ерлан Есенбаев, Халықаралық гуманитарлық-техникалық университетінің студенттері қатысты.

Қазіргі заманда азаматқа сотқа талап арыз беру үшін сотқа барып, уақытын жұмсап, жүйкесін жұқартуының еш қажеті жоқ. Сотта ендіріліп жатқан жаңа технологиялар әуре-сарсаңнан және қағазбастылықтан құтқарып, көмекке келеді.

Соңғы кездері IT-технологияларға көптеп көңіл бөлінуде. Сот жүйесінің ашықтығы мен қолжетімділігін қамтамасыз ету үшін көптеген жобалар қолға алынуда. Студенттер мен БАҚ өкілдері бейнеконференц – байланыс арқылы өткен сот процесіне қатысып, «Төрелік» ақпараттық жүйесінің, «Сот кабинеті» сервисінің мүмкіндіктерімен және сот актілерінің дерекқорымен, аудио-бейнежазба жүйесімен, «Талдау» форумымен танысты.

С.Кәрім мен Е.Есенбаев студенттерге сот мәжіліс залдарын көрсетіп, оларды толғандырып жүрген сұрақтарына жауап берді. Студенттер іс-шарада белсенділік танытып, сот жұмысын ішінен көруге мүмкіндік берген сот қызметкерлеріне алғыстарын білдірді.