Бүгін Түркістан облысы, Жетісай ауданы, Жылысу ауыл округіндегі «Ер-Те Агро» шаруа қожалығында еліміздегі жүзім шаруашылығын дамыту мақсатында республикалық семинар-кеңес өтті.
Шараға Украина елінің алдынғы қатарлы «Виноград-Одесса» тұқымбағының басшысы А. Гайдай, Жетісай ауданы әкімінің орынбасары А. Маханбетов және Алматы облысы мен Түркістан өңірінің барлық аудандарынан жүзім шаруашылығымен айналысып жүрген 50-ден астам шаруа қожалық төрағалары қатысты.
Семинардың мақсаты – жүзімнің асханалық сорттарының күтіп-бапталуы жолдарын талқылап, тірегіш қадаларды дұрыс орналастыру, қырқу-көму шараларының тиімділігін арттыру. Осы мақсатты көздеген «Ер-Те Агро» серіктестігінің құрылтайшысы Ербол Ералиев семинар қатысушыларына жүзім егудің тиімділігі мен қиындықтарын, оның күтіп-баптау жолдарын тәппіштеп түсіндіріп берді.
Оның айтуынша, Жетісай өңірі жүзім шаруашылығын дамытуға өте қолайлы өлке. Сондықтан егістік жерлерді әртараптандыру мақсатында жүзім егу ісінен жүрексінбеу керек. Керісінше, жүзім шаруашылығының қыр-сырын меңгеріп, әлемдік сұранысқа ие жүзім сорттарын өсіруге мүмкіндік мол. Осы тұрғыда семинарға қатысушылар өздеріне қажетті ақпараттармен толық қамтылып, сауалдарына нақты жауаптар алды.
Айта кетейік, жетісайлық «Ер-Те Агро» шаруа қожалығы осыдан 2 жыл бұрын Украинаның Одесса қаласынан жүзімнің 9 жаңа түрін сатып алып келіп, 40 гектар аумаққа отырғызған болатын. Бұл жүзімдердің бір ерекшелігі – күздің күндері топыраққа көмілмей-ақ өнім бере алады. Әр гектардан 20 тоннаға дейін өнім алуға болады. Сондай-ақ, бұл қожалық жүзім шаруашылығын дамытуда соңғы технологияларды кеңінен қолдануды жолға қойған.
Сонымен қатар, жүзімге қажетті барлық тіреуіштер мен өзге де керек-жарақтар қожалықтың өзінде әзірленеді. Бұл өз кезегінде өнімнің құны мен сапасына кепіл бола алады.
Семинар барысында қатысушылар қожалықтың жүзім алқабын аралап көріп, өздеріне қажетті ақпараттармен толығымен қамтылды. Сондай-ақ, қатысушыларға арнайы сертификат тапсырылды.
