Ел экономикасына 14,5 млрд. доллар инвестиция тартылды

24
Кәсіпорын

Ел экономикасына соңғы алты айда 14 жарым млрд доллар инвестиция тартылды. Бұл көрсеткіш өткен жылмен салыстырғанда 28 пайызға жоғары. Бұл туралы Сыртқы істер министрінің орынбасары Алмас Айдаров мәлімдеді.

Оның сөзінше жыл соңына дейін елге тартылған инвестиция көлемі 24 млрд АҚШ долларына жетеді деп жоспарланып отыр. Мемлекет басшысы алдағы 7 жылдың ішінде Қазақстан экономикасына сырттан кемінде 150 млрд АҚШ долларын тарту міндетін қойған. Мамандар бұл міндеттің орындалып жатқанын жеткізді.

Алмас Айдаров, ҚР Сыртқы істер министрінің орынбасары: «Біз үшін ең бастысы жалпы инвестиция көлемінің өсуі емес, оның сапалы өзгеруі. Бұрын шетелдік инвестицияның құрылымында бүкіл ақшаның 70 пайызы мұнай-газ саласына тиесілі болды. Ал соңғы үш жылды алсақ, трендтің өзгергенін көріп отырмыз және мұнай-газ саласындағы инвестиция үлесі – небәрі 45 пайыз. Біз үшін басым мәнге ие салалар – сауда, ақпарат, байланыс, өңдеу секторында инвестиция өсіп келеді».