ҚР Қарулы Күштерінде ұялы телефондарды пайдалану қағидалары жаңартылды. Қорғаныс министрлігінде техникалық құралдарды (оның ішінде мобильді құрылғыларды) енгізу, шығару және пайдалану тәртібін реттейтін бұйрыққа өзгерістер енгізілді.
Не өзгерді:
Сарбаздарға, курсанттар мен кадеттерге ұялы телефондарды орналасу орнына (казармаға) дейін өшірулі күйде алып келуге және алып шығуға рұқсат етілді. Телефондарды пайдалану өз бөлімшесі шегінде (казармада), сондай-ақ әскери госпитальдарда және әскери-медициналық мекемелерде рұқсат етіледі. Пайдалану уақыты жергілікті жерде командирлермен айқындалады — әдетте жауынгерлік және мемлекеттік-құқықтық дайындыққа кедергі келтірмейтін жеке уақыт ішінде.Бұған дейін әскери қызметшілер тек батырмалы телефондарды және қатаң шектеулі уақытта ғана пайдалана алатын.
Өзгерістер тұрмыстық жағдайларды жақсартуға және жақындармен байланыс орнатуға мүмкіндік беруге бағытталған.
