Шымкентте денесінің 94%-ын күйік шалған науқас ажалдан аман қалды. Тұрмыстық жағдайда газ-ауа қоспасының жарылуынан денесінің 94 пайызын ІІ–ІІІ дәрежелі күйік шалған науқасқа дер кезінде көрсетілген жоғары білікті медициналық көмектің арқасында оның өмірі сақталып қалды.
Науқас ауруханаға өте ауыр жағдайда жеткізіліп, бірден жансақтау бөліміне жатқызылды. Дәрігерлер алғашқы күндері оның өмірі үшін тәулік бойы күрес жүргізді. Күйіктік шок, ауқымды термиялық жарақат және асқыну қаупіне қарамастан, қарқынды терапия мен кешенді емнің нәтижесінде пациенттің жағдайы біртіндеп тұрақтанды.
Бір айға жуық емдеу және оңалту шараларынан кейін науқастың жағдайы жақсарып, 2026 жылғы 3 шілдеде амбулаториялық бақылауға шығарылды.
