Шымкентте «Интергаз» мекемесі директорының көлігіне оқ атып, қауін төндірген күдіктілер ұсталды. Оларды ұйымдасқан қылмыспен күрес басқармасының қызметкерлері Нариманов көшесіндегі гүл сататын сауда орны маңында қолға түсірген.
Ұсталғандардың саны – үшеу. Бейресми мәліметтерге сәйкес, жастары 30 шамасындағы үшеу «Интергаз» компаниясы директорының көлігіне оқ атқан деп күдіктелуде. Барлығы да Оңтүстіктің тумалары. Арнайы операция түнгі сағат 11 шамасында болды.
Еске сала кетсек, көлікке оқ қаңтар айында атылған. Қас қарая «ҚазТрансГаз Аймақ» мекемесінің аумағында тұрған «KIA» автокөлігіне оқ жаудырылды. Оқ атқандар медициналық бетперде киген екеу болған. Жедел-криминалдық топ оқиға орнынан травматикалық қарудың 5 гильзасын тапты. Оқ автомобильдің артқы жағындағы терезесін және қаңқасын тесіп өткен.
