«Ерекше жандар» бағдарламасының бүгінгі қонағы – Шымкент қаласындағы көзі нашар көретін балаларға арналған «Үміт» мектеп-интернатының оқушысы Сабина Есенғалиқызы Асқар.
– Көзі нашар көретін балаларға арналған «Үміт» мектеп-интернатында 4 сыныпта және №3 балалар эстетикалық саз мектебінде оқисың. Өнердің қай түріне қызығасың?
– Домбыра тартамын. Саз мектебінде домбыра класынан сабақ алып жүрмін. Бірнеше күй үйрендім. Алдағы уақытта күрделі күйлерді үйренуге ден қойып жүрмін.
– Күй тарту қиын емес пе?
– Басында қиын болатын. Бірақ уақыт өте келе бар ынтамды салып, үйреніп кеттім. «Жастар», «Өрнек», «Көкдөнен» күйлерін шерте аламын.
– Қандай арманың бар?
– Өзім оқып жүрген саз мектебін үздік бітіріп, колледжді жақсы көрсеткішпен аяқтап, үлкен сахналардан көрінгім келеді.
– Бос уақытыңда немен айналысасың?
– Кітап оқимын, домбыра тартамын. Үш сіңліме қараймын, анама көмектесемін. Отбасым үлкен. Атам, апам, әкем, анам, өзімнен үлкен әпкем бар, менен кейін үш бауырым бар. Мен Асқар атамның қызымын.
– Мектепте қандай пәндерді ұнатасың?
– Математика, әдебиет сабағы ерекше ұнайды.
– Кімдердің өлеңдерін оқисың?
– Мұқағали Мақатаевтың өлеңдері ұнайды, жақсы өлеңдерін жаттап аламын.
