Қаржы министрі Мәди Тәкиев мобильді аударымдарға шектеу енгізілгеннен кейін жеке кәсіпкер ретінде тіркелген адамдардың көбейгенін айтады.
Бүгінде үш айдың ішінде бір нөмірге әртүрлі адамдардан түсетін аударымдардың саны 100-ден аспауы тиіс. Одан көп болса, бақылау шаралары басталады. Жылдың басында барлығы дүрлігіп, қолма-қол ақша іздей бастаған еді. Дегенмен жеке кәсіпкер ретінде тіркелгендердің саны айтарлықтай өсті.
«Қазіргі кезде жағдай тынышталды, қолма-қол ақшаның көлемі азайып келеді. Адамдар қайтадан мобильді аударымдарға көшіп жатыр. Қаңтар айында шамамен 75 мың жеке кәсіпкер тіркелді. Бұрын бір айда 2-3 мың адам тіркелетін. Ал ақпан айында 70 мың жеке кәсіпкер тіркелді. Демек адамдар кәсібін заңдастырып жатыр», – деді Тәкиев үкіметтің отырысында.
Министрдің айтуынша, қазіргі кезде тағы бір шектеу талқыланып жатыр. Оған сәйкес, үш айда бір адамға жіберілген мобильді аударымдардың жалпы сомасы 255 мың теңгеден аспауы қажет.
Заң бойынша бір жылдық табысы 12 ең төменгі жалақыдан асатын, яғни, шамамен 1 миллион теңгені құрайтын адамдар жеке кәсіпкер ретінде тіркелуге міндетті.
