Соңғы уақытта Оңтүстік Қазақстан облысындағы жасы кәмелетке толмаған балаларды бейімдеу орталығына келіп түсетін балалар көбейген. Мысалы, қаңтар айында 82 бала түссе, оның 74-і отбасына қайтарылған.
Мұнда көбіне ата-анасынан айрылған, қаңғып, маскүнемдікке салынған және асырай алмайтын ата-аналардың балалары келіп түседі. Адасып қалған балаларды отбасына қайтару, ол үшін құқық қорғау органдарының қызметіне жүгіну де осы орталықтың міндеті. Бейімдеу орталығына жеткізілген балалардың құжаттары 3 айға дейін рәсімделіп, ата-анасы табылған жағдайда отбасына, табылмаса, балалар үйіне жіберіледі. Кейде баласынан бас тарту фактілерімен бірге қайта-қайта келетін балалар да кездеседі.
