АҚШ долларына шаққанда теңге бағамы құлдырағаннан кейін Шымкентте арзан бағамен өткен алғашқы жәрмеңке даумен басталды. Қаймана халық өнімді молынан алып қалу үшін ұзын-сонар кезекке тұрды. Алайда, сағаттап кезек күткен тұрғындардың үміті ақталмады. Себебі, жәрмеңкеде сапасыз өнімді саудалағандар бар болып шықты.
Қала тұрғыны: «Екі жарым сағат болды кезек күтіп тұрғаныма, азанғы сағат сегіз жарымда келгем. Кезегім келгенше көліктегі картоп таусылып қалды. Оның үстіне сатушылар «Алсаң — ал, алмасаң — алма» деп, дөрекілік танытып жатыр. Бұл не масқара!»
Жәрмеңкедегі арзандатылған азық-түлікті алу үшін таңертеңнен бастап кезекке тұрған тұрғындардың көңілі осылайша су сепкендей басылды. Өйткені, біресе көліктегі өнім жеткіліксіз болса, біресе қаптағы картоп шірік шығып, елді әбігерге салды.
Қала тұрғыны: «Мына қаптағы кортопты мен 3200 теңгеге сатып алдым. Орнынан жылжытсам, астынан суы шығып тұр. Алмаймын, басқасын ауыстырып бер десем, ауыстырылмайды деп айқайлайды. Мен мұны бала-шағам жесін деп алдым, енді не істеймін? Арзанның сорпасы татымас деген осы екен.»
Картоптың келісі — 55, пияз — 35, құмшекер — 115, сиыр еті — 900, ұнның келісі 50 теңгеден, шұжық өнімдерінің келісі 650-700 теңге аралығында саудаға түсті. Халықтың төмен бағадағы өнімге сұранысы жоғары. Оны жәрмеңкеге келген халықтың қарасынан байқауға болады.
Қала тұрғыны: «Осы маңда тұрамын. Апта сайын келемін, алма, бал, сүт өнімдерін аламын. Баға әзірге тұрақты. Бізге көтерілмегені жақсы ғой. Мына бағаның өзі қалтаға салмақ салады.»
Қазір баға әбден тұрақтанғанша әр сенбі-жексенбі күндері осындай жәрмеңке өтіп тұрмақ. Қоймадағы тонналап сақталған өнім жеткілікті деп сенім білдіріп отыр жергілікті билік өкілдері.
