Оңтүстік Қазақстан облысы Сайрам ауданында әлеуметтік-психологиялық сүйемелдеу орталығы ашылды. Орталық Қазақстанның бас прокуратурасының «Отбасындағы зорлық-зомбылықсыз Қазақстан» пилоттық жобасы аясында жүзеге асып отыр.
Бастаманы қолға алудағы мақсат – отбасы, ошаққасында болатын жанжалдарға тосқауыл қою, шаңырақ ынтымағын сақтау. Орталықта ерінен зәбір көріп, зорлық-зомбылық тауқыметін тартқандар мен ішімдік пен есірткіге салынып кеткендерге психологиялық қолдау көрсетілетін болады.
Орталықтың салтанатты ашылуына облыс әкімінің орынбасары Ербол Садыр, Сайрам ауданының әкімі Самат Сапарбаев, Қазақстанның бас прокурорының аса маңызды тапсырмалары жөніндегі аға көмекшісі С.Тұрсынбекова арнайы қатысып, пилоттық жобаның маңыздылығына тоқталды.
– Мұндай орталықтардың аудан орталығымызда ашылуы өте маңызды. Аудан тұрғындары қалаға сабылмай-ақ осы орталықтың көмегіне жүгіне алатын болады. Пилоттық жобаны жүзеге асырып отырған еліміздің бас прокуротурасына алғысымыз шексіз,- деді аудан әкімі Самат Сапарбаев.
Өз кезегінде сөз алған «Отбасындағы зорлық-зомбылықсыз Қазақстан» пилоттық жобасының жетекшісі Салтанат Тұрсынбекова орталықтың жұмыс ауқымын түсіндірді.
– Бүгінде барлық қызмет түрлері облыс орталығында көрсетіледі. Осындай орталықтарды аудандардан ашудағы негізгі мақсатымыз – ауыл тұрғындарына көмек қолын созу болатын. Біз ауыл тұрғындарының жан-айқайын, негізгі мәселелерінен хабардар болып отыруымыз қажет. Бүгінде отбасылық жағдайда тұрмыстық зорлық-зомбылықтың белең алған кезеңі. Сондықтан осындай орталықтар түрлі жағдайда қиындыққа душар болған әйелдер қауымына көмек көрсететін болады, – деді жоба жетекшісі.
Бас прокуратураның бастамасымен ашылған сектор ғимараты қажетті бөлмелермен қамтамасыз етілген. Мұнда қабылдау және дәрігер бөлмесімен қатар қажетті құралдармен жабдықталған психолог, тренинг, егу кабинеттері жұмыс істейді. Аталған орталық болашақта барлық мемлекеттік органдар тарапынан жасалатын алдын алу жұмыстарын үйлестіретін бірден-бір орган болмақ.
Айта кетейік, дәл осындай орталық Сарыағаш ауданында да ашылған болатын. Бір айдың аралығында орталық 50-ге тарта азаматшаға әлеуметтік көмек көрсетілген. Шара барысында «Өз бақытың өзіңнің қолыңда» атты қайырымдылық акциясы өтті. Акция аясында әйелдер қауымына арналған түрлі шеберлік сағаттары ұйымдастырылды.
ОҚО әкімінің баспасөз қызметі
Фото: Самат Мырзалиев
