Бұрын жүк тасушы болып жұмыс істеген азамат қойма кассасынан 6 000 000 теңге ұрлаған. Бұл туралы Түркістан облыстық полиция департаменті хабарлады. Баспасөз қызметінің мәліметінше, күдікті сағат 16:00 шамасында қойма ішіне кіріп, жұмысшылардың үйіне қайтқанын күтіп 5 сағат жасырынып отырған.
Жұмыс уақыты аяқталған кезде арам ойын іске асырыпты. Яғни сағат 21:30 шамасында қойманың терезесі арқылы кассаға өтіп, 6 000 000 теңгені алып оқиға орнынан бой тасалаған.
Жомарт Ғаппаров, Жетісай АПБ Жергілікті полиция қызметі бөлімшесі бастығының орынбасары: 1Тәртіп сақшылары жедел іске кірісті. Олар ұрлық қылмысын ашу үшін қажетті шараларды жүзеге асырды. Көрген-білгендерден сұрастыру жұмыстарын жүргізіп, бейнебақылау камераларын қарап шықты. Нәтижесінде, қылмысқа қатысы бар күдікті анықталды. Ол жұмыссыз, жергілікті тұрғын болып шықты. Анықталғандай, күдікті бұрын сол жерде жүк тасушы болып жұмыс жасаған. Қазіргі таңда күдікті қамауға алынып, оған қатысты сотқа дейінгі тергеу амалдары жүргізілуде1.
Күдіктіден айғақты зат ретінде 1 525 000 теңге алынып, иесіне қайтарылды. Ал іс ҚР ҚК-нің 188-бабы «Ұрлық» бойынша тіркеуге алынды.
