Инфрақұрылым құрылысы қарқынды жүргізілуде

33

Шымкенттің шетінде орналасқан Қайнарбұлақ тұрғын алабының тұрғындары бірнеше жылдан бері табиғи газ жүргізу мәселесін, жалпы инфрақұрылым мәселесін шешіп беруді айтып келеді. Бүгінде қала әкімдігі тарапынан аталған мәселе біртіндеп шешімін тауып отыр.

Бүгінде тұрғын алапта инфрақұрылым құрылысы қарқынды жүргізілуде. Бүгін шаһар басшысы М.Әйтенов аталған аумақта атқарылып жатқан жұмыс сапасын кезекті рет
тексеріп шықты.
“Тұрғындар тарпынан жасалған ескертулер, өтініштер еленбей қалмауы керек. Бірінші кезекте сапаға жіті мән береміз, ал нысандардың мерзімінен кешіктірілмей пайдалануға берілуі – негізгі шарт”, – деді қала әкімі тиісті сала басшыларына тапсырма жүктей отырып.
Қайнарбұлақ тұрғын алабын ауыз сумен қамту құрылысы жоспарға сай кезең кезеңімен жүзеге асуда. Ауыз су жүйелерінің жалпы ұзындығы 329,8 шақырымды құрайды. Бүгінгі таңда 30%-ы тартылған. Жоспар бойынша құрылыс жұмыстары 2023 жылы аяқталады.
Ал табиғи газбен қамту құрылысы II кезең бойынша жүргізілуде. І кезең бойынша жалпы жұмыс көлемінің 25%-ы аяқталған. ІІ кезеңнің де құрылыс жұмыстары қарқынды. Тұрғындар игілігіне келесі жылы берілмек.
Сондай-ақ елді мекенді сапалы электр қуатымен қамту бойынша да жұмыстар жүргізілуде. Электр жүйелерінің жалпы ұзындығы 68, 6 шақырымды құрайды. Бүгінде оның 40%-ы аяқталды. 2023 жылдың алғашқы жарты жылдығына дейін жергілікті халық сапалы электр жарығын тұтынатын болады.
Оған қоса, көшелерді жарықтандыру мәселесі де рет-ретімен шешілуде. Биыл Дала, Бөлешов, №125 мектеп орналасқан көшелер жарықтандырылса, келесі жылы Достық, Фабрика, Металлург, Зауыт көшелері жарықтандырылатын болады.
Қайнарбұлақтықтар бүгінде инфрақұрылым құрылыстарының қызу жүргізіліп жатқанына қуанулы. Табиға газға қол жеткізетін күн де таяу.