Түркістан облысы ПД Кентау қалалық полиция бөлімінің қызметкерлері жедел-іздестіру шаралары нәтижесінде жертөлені фитолабораторияға айналдырып, есірткі өсірген кентаулық тұрғынды анықтады.
Нақтырақ айтсақ, «Қарасора-2023» жедел-профилактикалық шарасы аясында жүйелі жұмыс жүргізген полицейлер, жатын бөлмесінің астынан арнайы жертөле істеп, онда фитозертхана жасаған тұрғынды анықтады.
Жедел уәкілдер тінту барысында оқиға орнынан 24 түп шелекке отырғызылған «сора» өсімдігі мен 20 дана сіріңке қорабына салынған есірткі өсімдігі, сондай-ақ 1 дана қағаз орамасын тауып, айғақты зат ретінде тәркілеп алды.
Сараптама қорытындысы бойынша шелекке егілген өсімдік жалпы салмағы 2 келіден астам «сора», ал сіріңке қорабы мен орамадағы есірткі 300 грамнан асатын «кептірілген марихуана» болып шықты.
Тәртіп сақшылары аталған жайтты ҚР ҚК-нің 300-бап 2-бөлігі «Құрамында есірткі заттар бар, өсіруге тыйым салынған өсімдіктерді заңсыз егіп өсіру» бойынша тіркеуге алды.
Күдікті ер адам қамауға алынды. Сотқа дейінгі тергеп-тексеру амалдары жүргізілуде.
