Оңтүстіктің үш спортшысы Сочи Олимпиадасында сынға түседі. Олар: Жібек Арапбаева, Жанбота Алдабергенова және Бағлан Іңкәрбек. Жерлестеріміздің үшеуі де фристаил-акробатикадан шеберлік танытуға тырысады. Жібек осыған дейін Ванкуверде өткен Олимпиада ойындарында тәжірибе жинақтап қайтқан болатын. Содан кейін Қазақ жерінде өткен Азиадада топты жарды. Бұл жолы да бойжеткеннен Оңтүстік жұртшылығы жүлде күтеді. Сочиде олар ақпанның 14-і күні жарысқа шығады. Жеңіс сыйлар деген үмітпен жерлестеріміз саңлақтарға батасын беріп, Ресейге шығарып салды.
Бақытжан Зиябеков, қысқы спорт түрлері мектебінің директоры: «Бұл үш спортшымыз да төрт жылдан бері түрлі жарыстарға қатысып, тәжірибе жинақтады. Оның үстіне оқу жаттығу жиындары да шетелдерде өтті. Бір жылдың өзінде Ресейден бастап, Қытайға дейін бір қатар шетелдерге жіберіп, шеберлігін шыңдадық. Ендігі үміт Олимпиада ойындарының жүлдесі болып отыр.»
