«Қаладағы орта мектептердегі спорт залы бос тұрмауы тиіс!» Бұл — облыс әкімі Асқар Мырзахметовтың тапсырмасы. Алайда, білім ошақтарының кейбірінде спорт залы мүлдем жоқ. Ал жалғыз жаттығу залы бар оқу орындарында спорттық секциялар ашуға мүмкіндік жоқ, уақыт та тым аз.
№40 мектеп-гимназияда бір спорт залы бар. Былтыр ғана жөнделген. Оқу орнында екі мыңға жуық оқушы білім алады. Бірнеше спорттық секцияға уақыт жоқ. Оның үстіне спорт мектептері бұл оқу орнына келе бермейді. Бүгінде тоғызқұмалақтан бөлек жеңіл атлетика секциясы ғана жұмыс жасайды. Ең қызығы, «Спорт патшайымы » атанған жеңіл атлетикадан шәкірт дайындау бұл оқу орнының дәстүріне айналғандай. Өйткені, жылдар бойы №40 мектеп-гимназияның оқушылары қалалық жеңіл атлетика ордасымен бірлесе жұмыс жасап келеді. Секцияға қатысып жүрген жеткіншектердің бірқатары жарыстарға да шығып жүр.
