Шымкенттегі А.Байтұрсынов атындағы №50 мектеп-гимназиясында «Ай қабақты, алтын кірпік арулар» атты қыз сыны байқауы өтті. Байқау 8 наурыз Халықаралық әйелдер мерекесіне орайластырылған.
Қазақтың салт-дәстүрін қыздардың бойына сіңіру, болашақ ана, болашақ жар, шаңырақтың шырақшылары ретінде тәрбиелеу, балақайлардың шығармашылық қабілетін шыңдау мақсатында өткізілген сайысқа даярлық тобында тәлім алып жүрген 13 қыз қатысты.
Байқауда қыздар өз өнері мен білімін ортаға салды. Арулар «Сәлем – сөздің анасы» кезеңінде жиналған қауымға өздерін таныстырып, ұлттық киім үлгілері мен сахнада өзін-өзі ұстай білу мәдениетін көрсетсе, «Өнерлі өрге жүзер» кезеңінде қазылар алқасына өз өнерлерін паш етті. Ал, «Шебердің шыңы» сайысында бойжеткендер ата-анасымен бірге ұлттық қол бұйымдарын әзірлеуден сынға түссе, «Білімді мыңды жығар» бөлімінде ару қыздардың білім деңгейлері бағаланды. Сонымен қатар, алдын-ала берілген үй тапсырмасына жауап беріп, «Қыздарға әсемдік жарасады» кезеңінде әр түрлі тұрмыстық қалдықтардан тігілген киім үлгілерін көрсетті.
Қазылар алқасының шешімімен бас жүлде Кәусар Әбдіқалиға бұйырса, Перизат Ермек – І-ші орынды иеленді. Мерей Қожихова мен Махинұр Азимова – ІІ-ші, Әсел Башенова мен Еңлік Орал – ІІІ орынды місе тұтты. Қатысушылардың барлығы арнайы сыйлықтармен марапатталды. Ұйымдастырушылардың айтуынша, мұндай байқауларды мектеп қабырғасында өткізу жас балғындардың қазақ тілін, қазақтың дәстүрлері мен салтын құрметтеуге, тәрбиелеуге мүмкіндік ашады.
Айжан ЕРМЕКҚЫЗЫ
