Наурыздың 19-ы – «Жайнау» күні. Ұлыстың Ұлы күнін тоғыз күн атап өтуді әдетке айналдырған Оңтүстік жайнау күнін жадырата қарсы алды. Шымкенттік жастар автошеру ұйымдастырып, қала тұрғындарын Наурыз мерекесімен құттықтады.
Наурыз алаңына жиналған жастардың көңілі көтеріңкі. Автошеру алдындағы соңғы дайындықтарын пысықтауда. «Жайнау» күнінде қала тұрғындарын құттықтау мәртебесіне ие болғандарына риза.
Ерлан Айтбаев, «Шымкент жастары» мекемесінің директоры: «Бүгін – «Жайнау»күні. Жуанның жіңішкеріп, жіңішкенің үзілетін шағы. Көктем келді, жастарымыз жайнап шыға келді. Қаланың белсенді жастары болып, қала тұрғындарын құттықтағалы жатырмыз.»
Тізілген көліктер уақытты созбай шеруді бастап жіберді. Бәйдібек би даңғылынан басталған автошеру қала тұрғындарын таңырқатты. Көк байрақты көкке желбіреткен жастар береке мен бірліктің бастауы болған Наурыз мерекесімен шымкенттіктерді құттықтады.
Наурызнама дәстүрін заманауи үлгіде қайта жаңғыртуға бағытталған тоғыз күндік шара аясында ұйымдастырылған автошеру қаланың орталық көшелерінен де өтті. Шымкенттіктерге мерекелік көңіл күй сыйлаған топ соңында Әл Фараби алаңына тоқтады.
Автошеру соңында қаланың қоғамдық көліктерінде «Наурыз» мерекесі құтты болсын!» деген тілек жазылған 500 дана стикерлер жапсырылып, билбордтар ілінді.
